काठमाडौं । पत्रकार सुरेश रजकको हत्या प्रकरणमा दोषीलाई कारबाहीको माग गर्दै देशभर विरोध प्रदर्शन भएको छ। नेपाल पत्रकार महासंघको आह्वानमा माइतीघर मण्डलासहित विभिन्न स्थानमा विरोध सभा गरिएको हो।
त्यस्तै धादिङमा पनि एभिन्युज टेलिभिजनका क्यामेरापर्सन सुरेश रजकको हत्या तथा सञ्चार गृहमा गरिएको आगजनी विरुद्ध विरोध प्रदर्शन गर्दै श्रद्धाञ्जली अर्पण गरिएको छ।
महासंघको अगुवाइमा आज बिहान धादिङ बेसि स्थित महासंघ कार्यालय परिसरमा पत्रकार रजकको हत्याको सत्यतथ्य पत्ता लगाई दोषीलाई कडा कारबाही गर्न माग गर्दै प्रदर्शन गरिएको हो।
महासंघका कार्यवाहक अध्यक्ष दीपक आचार्यले पत्रकार रजकको हत्या षड्यन्त्रपूर्वक भएको भन्दै घटनाको सत्यतथ्य छानबिन गरी दोषीलाई कानुनी दायरामा ल्याउन सरकारसँग माग गरे।
महासंघका पूर्वअध्यक्ष तारानाथ दाहाल, प्रेस चौतारीका अध्यक्ष गणेश पाण्डे, रिपोर्टर्स क्लबका अध्यक्ष ऋषि धमला लगायतले पत्रकार र सञ्चारमाध्यममाथि भएको आक्रमणको निन्दा गरेका छन्।
महासंघका महासचिव रामप्रसाद दाहालले घटनामा संलग्न दोषीलाई कारबाही गर्दै घाइते पत्रकारहरूको उपचार, राहत तथा क्षतिपूर्तिको व्यवस्था गर्न माग गरे। उनले माग पूरा नभए आन्दोलनलाई थप सशक्त बनाइने चेतावनी दिए।
शुक्रबारको प्रदर्शनका क्रममा केही प्रदर्शनकारीले सञ्चारमाध्यमका कार्यालयमा ढुंगामुढा गरेका थिए भने केही पत्रकारहरू आक्रमणको निशानामा परेका थिए। पत्रकार महासंघले आगामी दिनमा पत्रकार सुरक्षा मजबुत बनाउन सरकारको ध्यानाकर्षण गराएको छ।
