काठमाडौं । नेपाल पर्वतारोहण संघ (NMA) को आगामी निर्वाचनलाई लक्षित गर्दै पर्यटन क्षेत्रका अनुभवी व्यक्तित्व कुल बहादुर गुरुङले अध्यक्ष पदमा औपचारिक उम्मेदवारी घोषणा गरेका छन्। उनले नेपालका हिमाली क्षेत्रको अन्तर्राष्ट्रिय पहिचानलाई सुदृढ गर्दै पर्वतीय पर्यटनको दीगो विकास गर्ने प्रतिबद्धता जनाएका छन्।
“पर्यटनमा पारदर्शिता र सहकार्यको नयाँ युग सुरु गर्ने छु” — गुरुङ
तीन दशकभन्दा बढी समयदेखि पर्यटन क्षेत्रमा क्रियाशील गुरुङले संघको महासचिवको रुपमा एक कार्यकाल सफलतापूर्वक पूरा गरिसकेका छन्। उम्मेदवारी घोषणासँगै उनले भने,
“नेपालको पर्वतीय पर्यटन केवल हिमाल चढ्ने माध्यम होइन, समुदाय सशक्तिकरण, श्रमिक अधिकार र वातावरण संरक्षणको स्रोत हुनुपर्छ। मेरो उम्मेदवारी जिम्मेवारी, अनुभव र साझा नेतृत्वको आधारमा आएको हो।”
उनको नेतृत्वमा NMAले नयाँ ऊर्जा पाउने अपेक्षा गरिएको छ। गुरुङले विगतमा नेपालका हिमाली सम्भावनाहरूलाई अन्तर्राष्ट्रिय मञ्चमा चिनाउन अभियान सञ्चालन गरेका थिए।
उनले सुरक्षित आरोहण व्यवस्थापन, गाइड तथा शेर्पाहरूको सामाजिक सुरक्षाको वकालत गर्दै आएका छन्।
पर्यटन व्यवसायी, पर्वत गाइड, आरोही सहयोगी (शेर्पा), ट्राभल एजेन्सी तथा सरोकारवाला निकायहरूबाट गुरुङको उम्मेदवारीलाई सकारात्मक समर्थन प्राप्त भएको छ। धेरैले संघमा पारदर्शिता, नवीन योजना र समन्वयात्मक नेतृत्वको नयाँ युग सुरु हुने आशा गरेका छन्।
संघको निर्वाचन यही भदौ ८ गते हुने तय भएको छ। उम्मेदवारहरू बीच प्रतिस्पर्धा तीव्र बन्दै जाँदा कुल बहादुर गुरुङको उम्मेदवारी अब चुनावी बहसको केन्द्रबिन्दुमा देखिन थालेको छ।
