अन्तर्राष्ट्रिय खबर । मध्यपूर्व क्षेत्रमा जारी द्वन्द्वले विश्व ऊर्जा बजारमा ठूलो असर पारेको छ। करिब ५० दिनको अवधिमा अन्तर्राष्ट्रिय बजारमा अर्बौँ डलर बराबरको कच्चा तेल आपूर्ति प्रभावित भएको आँकलन गरिएको छ।
ऊर्जा क्षेत्रका विश्लेषकहरूका अनुसार युद्धका कारण तेल उत्पादन र ढुवानी दुवैमा अवरोध सिर्जना भएको छ। यसले गर्दा विश्व बजारमा तेलको अभाव देखिएको छ भने मूल्यमा पनि उतारचढाव बढेको छ।
खाडी क्षेत्रका प्रमुख उत्पादक देशहरूबाट हुने निर्यातमा गिरावट आएको बताइएको छ। विशेषगरी हवाई इन्धन आपूर्तिमा उल्लेख्य कमी आएको छ, जसले अन्तर्राष्ट्रिय उडान र ढुवानी क्षेत्रमा असर पार्न सक्ने देखिएको छ।
यद्यपि केही रणनीतिक मार्गहरू पुनः सञ्चालनमा ल्याइएका छन्, तर पूर्वाधारमा भएको क्षतिका कारण आपूर्ति प्रणाली तत्काल सामान्य अवस्थामा फर्किने सम्भावना कम रहेको विज्ञहरूको भनाइ छ।
यस अवस्थाले आगामी समयसम्म विश्व अर्थतन्त्रमा दबाब सिर्जना गर्न सक्ने र ऊर्जा बजार अस्थिर रहन सक्ने अनुमान गरिएको छ।
