काठमाडौँ । विश्वभर आज ‘मानवता जोगाऔँ’ भन्ने मुल नारासहित रेडक्रस दिवस मनाइएको छ। रेडक्रस तथा रेडक्रिसेन्ट संस्थामा संलग्न स्वयंसेवक र कर्मचारीहरूको मानवीय सेवालाई सम्मान गर्न हरेक वर्ष मे ८ मा यो दिवस मनाउने गरिन्छ।
रेडक्रस अन्तर्राष्ट्रिय समितिका संस्थापक तथा नोबेल शान्ति पुरस्कार विजेता हेनरी ड्युनाको जन्मदिनको अवसर पारेर विश्वका विभिन्न देशमा विविध कार्यक्रमसहित यो दिवस मनाइन्छ।
प्राकृतिक प्रकोप, युद्ध, विपद् तथा स्वास्थ्य संकटका बेला मानव सेवामा समर्पित रेडक्रस र रेडक्रिसेन्टका आदर्श र सिद्धान्तबारे जनचेतना फैलाउने उद्देश्यले यो दिवसले विशेष महत्व राख्छ।
अहिलेको विश्व परिवेशमा बढ्दो द्वन्द्व, स्वास्थ्य समस्या र सामाजिक असमानताबीच मानवीय मूल्यलाई कायम राख्न यो दिवस प्रेरणादायी हुने रेडक्रसका स्वयंसेवकहरू बताउँछन्। उनीहरूका अनुसार सहानुभूति, सहयोग र एकताको भावनालाई जीवन्त राख्न रेडक्रस दिवस महत्त्वपूर्ण अवसर हो।
