न्यू किबो बोर्डिङ स्कूलमा दीक्षान्त समारोह र एसईई छात्र-छात्राको विदाई

धादिङ । नीलकण्ठ नगरपालिका–३ मा रहेको न्यू किबो बोर्डिङ स्कूलले दीक्षान्त समारोह तथा एसईई परीक्षार्थीहरूका लागि बिदाई कार्यक्रम सम्पन्न गरेको छ।

विद्यालयले मंगलबार आयोजित विशेष समारोहमार्फत युकेजी कक्षामा अध्ययनरत ९० जना विद्यार्थीको दीक्षान्त सम्पन्न गरेको हो। साथै, शैक्षिक सत्र २०८१ मा एसईई परीक्षा दिएका विद्यार्थीहरूलाई विदाई गरिएको छ।

कार्यक्रम विद्यालयका प्रधानाध्यापक प्रयास रेग्मीको अध्यक्षतामा सम्पन्न भएको थियो। नीलकण्ठ नगरपालिकाका प्रवक्ता तथा वडा नं. ८ का वडा अध्यक्ष प्रकाश कुमार श्रेष्ठ प्रमुख अतिथि रहनुभएको थियो। कार्यक्रममा काशीनाथ कोईराला, सिताराम महत, देवी कोईराला, अनुप भट्ट, मिलन गुभाजु, मुक्ती लोहनी लगायत शिक्षक, विद्यार्थी, पत्रकार तथा अभिभावकहरूको उपस्थिति थियो।

कार्यक्रममा एसईई परीक्षापछि विद्यालयबाट बिदाइ हुँदै गरेका विद्यार्थीहरूले आफ्ना अनुभवहरू बाँडेका थिए। उनीहरूले विद्यालय जीवनसँग जोडिएका आफ्ना स्मरणीय क्षणहरू साझा गर्दै भाइबहिनीहरूलाई मार्गनिर्देशन दिएका थिए। कक्षा ९ मा अध्ययनरत विद्यार्थीहरूले एसईई परीक्षार्थीहरूको उज्ज्वल भविष्यको कामना गर्दै शुभकामना व्यक्त गरेका थिए।