अमेरिकी अन्तरिक्ष संस्था नासाले नौ महिनादेखि अन्तरिक्षमा रहेका अन्तरिक्ष यात्री सुनिता विलियम्स र बुच विल्मोरलाई सुरक्षित रूपमा पृथ्वीमा फर्काउने तयारी थालेको छ। गत वर्ष जुन ५ मा बोइङको स्टारलाइनर अन्तरिक्ष यानमार्फत अन्तर्राष्ट्रिय अन्तरिक्ष स्टेशन (आईएसएस) गएका उनीहरूलाई आठ दिनपछि फर्काउने योजना थियो। तर, अन्तरिक्ष यानमा आएको प्राविधिक समस्याका कारण उनीहरू अझै पनि अन्तरिक्षमै छन्।
हाल, नासाले नयाँ अन्तरिक्ष अभियान सुरू गरेको छ, जसअन्तर्गत अन्तरिक्ष स्टेशनमा नयाँ टोली पठाइनेछ। नयाँ टोली त्यहाँ पुगेपछि सुनिता विलियम्स र बुच विल्मोरको फिर्ती प्रक्रिया अघि बढ्नेछ।
अन्तरिक्ष मिसनका प्रमुख अधिकारीहरूका अनुसार उनीहरूको स्वास्थ्य अवस्था सामान्य छ, र आवश्यक तयारी पूरा भएपछि उनीहरूलाई सुरक्षित रूपमा पृथ्वीमा ल्याइनेछ।
