काठमाडौ । बागमती प्रदेशमा नयाँ मुख्यमन्त्री इन्द्रबहादुर बानियाँले विश्वासको मत त प्राप्त गरे, तर यो प्रक्रिया सहज भने थिएन। पूर्वमुख्यमन्त्री बहादुरसिंह लामासँग नजिक रहेका नेपाली कांग्रेसका १३ सांसदले आफ्नो समर्थनका लागि तीन जना सांसदलाई मन्त्री बनाउने शर्त राखेका थिए।
प्रदेशसभामा बहुमतका लागि ५६ मत आवश्यक थियो। कांग्रेसका ३६ सांसदमध्ये यदि लामा पक्षका १३ जना टाढा बसे भने, एमालेका २७ सांसदको समर्थनसहित पनि बानियाँलाई ५० मत मात्र पुग्ने थियो। यही कारण विश्वासको मत दिनुअघि लामापक्ष काठमाडौँमै बसेर दबाब दिइरहेको थियो।
तर, पार्टी सभापति शेरबहादुर देउवा र अन्य केन्द्रीय नेताहरूको आग्रहपछि ती सांसद हेटौँडा गए। बाटोमा नै मुख्यमन्त्रीसँग मन्त्री नियुक्तिको विषयमा छलफल भएको बताइन्छ। अन्ततः प्रदेशसभा पुगेपछि लामा समूहले पनि समर्थन जनायो र बानियाँले कुल ६३ मत पाए।
विश्वासको मत प्राप्त भए पनि लामा पक्षका सांसदहरू अहिले आफ्ना तीन नाम—गोविन्द लम्साल, माया श्रेष्ठ र गीता गुरुङ—मन्त्री बन्ने कि नबन्ने भन्नेमा पर्खाइमा छन्। बानियाँले भने बाँकी मन्त्री नियुक्ति साउनभित्रै गर्ने र दलको सल्लाहअनुसार विभाग तोक्ने बताएका छन्।
