म्यानमारमा गएको शक्तिशाली भूकम्पका कारण ठूलो जनधनको क्षति भएको छ। पछिल्लो विवरणअनुसार, भूकम्पमा परी १६४४ जनाको मृत्यु भएको छ भने ३४०० भन्दा बढी घाइते भएका छन्।
रिक्टर स्केलमा ७.७ म्याग्निच्युडको भूकम्प म्यानमारको दोस्रो ठूलो सहर मन्डले नजिक केन्द्रित थियो। स्थानीय समयअनुसार शुक्रबार बिहान ११:५० बजे पहिलो भूकम्प गएको थियो, जसको तीव्रता ७.२ मापन गरिएको थियो। त्यसपछि थप परकम्पहरू पनि गएका छन्, जसमा ७.० र ६.४ म्याग्निच्युडका झट्का महसुस गरिएको छ।
म्यानमारका अधिकारीहरूले अझै १३९ जना बेपत्ता रहेको जानकारी दिएका छन्। भूकम्प प्रभावित क्षेत्रमा उद्धार कार्य जारी छ, भने अस्पतालहरूमा घाइतेहरूको संख्या बढ्दो छ।
यस भूकम्पको प्रभाव भारत, चीन, बंगलादेश लगायतका छिमेकी देशहरूमा समेत महसुस गरिएको छ। थाइल्यान्डमा समेत ठूलो क्षति भएको बताइन्छ, जहाँ बैंककमा एक निर्माणाधीन भवन भत्किएको छ।
म्यानमार र थाइल्यान्डमा आपतकाल घोषणा गरिएको छ, भने उद्धार तथा राहत कार्य तीव्र पारिएको छ। थप विवरण आउन बाँकी छ।
