काठमाडौं। पूर्वराजा ज्ञानेन्द्र शाहको हालैको सक्रियताले राजनीतिक वृत्तमा तरंग पैदा गरेको छ। विभिन्न स्थानमा राजसंस्थाको समर्थनमा भएका प्रदर्शनपछि दलहरूबीच छलफल सुरु भएको छ। यसै क्रममा माओवादी केन्द्रका अध्यक्ष पुष्पकमल दाहाल ‘प्रचण्ड’ले संसदमा धारणा राख्ने तयारी गरेका छन्।
सभामुख देवराज घिमिरेसँग प्रमुख सचेतकहरूले गरेको छलफलपछि प्रचण्डलाई मंगलबार संसदमा बोल्ने समय दिइएको छ। खुमलटार स्रोतका अनुसार प्रचण्डले पूर्वराजा शाहको गतिविधि, हालको राजनीतिक परिवेश, र सरकारको भूमिकाबारे आफ्नो धारणा स्पष्ट गर्नेछन्।
स्रोतका अनुसार प्रचण्डले सदनमा कडा अभिव्यक्ति दिने तयारी गरेका छन्। उनी प्रधानमन्त्री केपी शर्मा ओलीसहित अन्य नेताहरूको भूमिकाबारे पनि प्रतिक्रिया दिने सम्भावना रहेको छ। हालै राजसंस्थाको समर्थनमा देखिएको जनलहर र त्यसको प्रभावलाई लिएर राजनीतिक दलहरूमा तीव्र बहस चलिरहेको छ।
