अन्तरास्ट्रिय खबर । उत्तर कोरियाले कोभिड-१९ को फैलावटका बीच आन्द्रासम्बन्धि अज्ञात रोगको प्रकोपसँग आफ्नो देश जुधिरहेको बताएको छ ।
देशका नेता, किम जोङ-उनले क्वारेन्टिनका नियम लागू गर्न आदेश दिएको आधिकारिक केसीएनए समाचार एजेन्सीले रिपोर्ट गरेको छ ।
उनले ‘एक्युट इन्टेरिक एपिडेमिक’ बाट पीडित बिरामीहरूलाई मद्दत गर्न बुधबार हेजु शहरमा औषधि पठाएको बताइएको छ ।
स्वास्थ्य विज्ञहरूले यो रोग टाइफाइड वा हैजा हुनसक्ने आशंका गरेका छन् ।
उत्तर कोरियाले मे महिनामा लाखौँ मानिसलाई ज्वरो आएपछि आपतकालीन अवस्थाको घोषणा गरेको थियो । त्यतिबेला यहाँ कोरोनाको महामारी फैलिएको हुनसक्ने आशंका धेरैले गरेका थिए ।
उत्तर कोरियाले पछिल्लो रोगको प्रकोपबाट प्रभावित व्यक्तिहरूको संख्याबारे कुनै जानकारी दिएको छैन । साथै, यो कस्तो खालको रोग हो भन्नेबारे पनि कुनै जानकारी दिएको छैन । तर इन्टरिकले ग्यास्ट्रोइन्टेस्टाइनल ट्र्याक्टलाई जनाउँछ ।
‘किमले संदिग्ध केसहरूमार्फत् यसको फैलावटलाई राम्ररी नियन्त्रण गर्न क्वारेन्टाइनमा राख्ने उपाय अपनाएर, महामारीविज्ञान परीक्षण र वैज्ञानिक परीक्षणमार्फत् केसहरू पुष्टि गरी सकेसम्म छिट्टै महामारीलाई नियन्त्रण गर्नुपर्ने आवश्यकतामा जोड दिए,’ केसीएनएले भनेको छ ।
अन्तर-कोरियाली मामिलाहरू सम्हाल्ने दक्षिण कोरियाको एकीकरण मन्त्रालयका एक अधिकारीले रोयटर्स समाचार एजेन्सीलाई सरकारले यो प्रकोप हैजा वा टाइफाइड भएको शंका गरेको जानकारी दिएका छन् ।
दक्षिण ह्वाङ्घाई प्रान्त, जहाँ हाइजु अवस्थित छ, उत्तर कोरियाको मुख्य कृषि क्षेत्र हो, जसले देशको व्यापक खाद्यान्न अभावलाई अझ खराब बनाउन सक्छ ।
प्योङयाङले ज्वरोका बिरामीहरूको संख्याबारे जानकारी दिँदै आएको छ, तर देशमा कोविड परीक्षण किटहरूको अभाव छ ।
उत्तर कोरियाले बिहीबार थप २६,०१० जनामा ज्वरोको लक्षण भएको रिपोर्ट गरेको छ, अप्रिलको अन्त्यदेखि देशभर ज्वरोका बिरामीहरूको कुल संख्या ४० लाख भन्दा बढी पुगेको छ ।
प्रकोपसँग जोडिएको मृत्युको संख्या ७३ रहेको सरकारले बताएको छ । तर विश्व स्वास्थ्य संगठन र अन्यले अवस्था थप खराब हुने आफूहरुलाई डर भएको बताएका छन् ।
उत्तर कोरियाको स्वास्थ्य सेवा प्रणाली धरासयी छ र यसले खोपका लागि अन्तर्राष्ट्रिय प्रस्तावहरू अस्वीकार गरेको छ ।
