तालिबानहरूले उत्तरी शहर सेबेरगानमा आफ्नो नियन्त्रण कायम भएको बताइरहँदा संयुक्त राज्य अमेरिकाले हालैका दिनमा अफगान सरकारको समर्थनमा हवाई हमलाहरूलाई तीव्र बनाएको बताएको छ।
यसअघि अफगान अधिकारीहरूले लामो दूरीमा बम प्रहार गर्न सक्ने बमवर्षक प्रयोग गरिएको र त्यसले लडाकुहरूतर्फ ठूलो क्षति पुर्याएको बताएका थिए।
बीबीसीसँग कुरा गर्दै रक्षा मन्त्रालयका प्रवक्ता फवाद अमनले अमेरिकी बी-फाइभटू हवाईजहाजले गरेको आक्रमणमा २०० भन्दा बढी विद्रोही मारिएको बताए।
यसअघि तालिबानले उनीहरूले सेबेरगान शहरमा नियन्त्रण कायम गरेको जनाएका थिए।
दुई दिनमा लडाकुहरूको नियन्त्रणमा पुगेको त्यो दोस्रो प्रान्तीय राजधानी हो।
शुक्रवार दक्षिण पश्चिममा अवस्थित निम्रोज प्रान्तको राजधानी जारन्जमाथि लडाकुहरूले नियन्त्रण कायम गरेका थिए।
