काठमाडौं । रसुवा र नुवाकोट हुँदै बग्ने नदी तथा खोलामा पुनः पानीको बहाव बढ्न सक्ने भएकाले सम्भावित आकस्मिक बाढीप्रति सावधानी अपनाउन आग्रह गरिएको छ।
जल तथा मौसम विज्ञान विभागअन्तर्गतको बाढी पूर्वानुमान महाशाखाका अनुसार भोटेकोशी, त्रिशूलीसहित यी जिल्लाका विभिन्न नदी तथा खोलामा पानीको बहाव बढ्ने सम्भावना छ। त्यसैले नदी किनार तथा जोखिमयुक्त क्षेत्रमा बसोबास गर्ने नागरिकलाई विशेष सतर्कता अपनाउन सुझाव दिइएको छ।
पछिल्लो समय भोटेकोशी र त्रिशूली नदीको बहाव सतर्कता तहभन्दा तल रहेको भए पनि बाढीको जोखिम पूर्ण रूपमा समाप्त नभएको महाशाखाले जनाएको छ। मौसममा हुने परिवर्तनसँगै पानीको बहाव अचानक बढ्न सक्ने भएकाले नदी आसपासका बासिन्दालाई सचेत रहन आग्रह गरिएको हो।
महाशाखाका अनुसार आगामी तीन दिन देशका प्रमुख नदी तथा तिनका सहायक नदीमा पानीको सतह बढ्ने सम्भावना छ। विशेषगरी त्रिशूली नदीको बेत्रावती क्षेत्र, नारायणी नदीको देवघाट तथा अन्य जलमापन केन्द्रहरूमा बहाव बढ्ने पूर्वानुमान गरिएको छ।
त्यस्तै देशका विभिन्न पहाडी क्षेत्रमा रहेका साना नदी तथा खोलामा समेत आकस्मिक बाढी आउन सक्ने सम्भावना रहेको जनाइएको छ। रसुवा र नुवाकोटसँगै सिन्धुपाल्चोक, दोलखा, गोरखा, चितवन, मकवानपुर तथा काठमाडौं उपत्यकाका आसपासका क्षेत्रमा समेत नदी तथा खोलाको अवस्था निगरानी गर्न सुझाव दिइएको छ।
सम्भावित जोखिमलाई मध्यनजर गर्दै नदी किनारमा बस्ने नागरिकले मौसम तथा बाढीसम्बन्धी आधिकारिक सूचना नियमित रूपमा हेर्न, रातिको समयमा विशेष सावधानी अपनाउन र पानीको बहाव अचानक बढेमा सुरक्षित स्थानतर्फ जान आग्रह गरिएको छ।
विशेषगरी यसअघि बाढी तथा पहिरोबाट प्रभावित क्षेत्रमा थप जोखिम हुन सक्ने भएकाले स्थानीय प्रशासन तथा सुरक्षा निकायले जारी गर्ने सूचना पालना गर्न सम्बन्धित सबैलाई आग्रह गरिएको छ।
