काठमाडौँ । प्रतिनिधि सभा निर्वाचनको अन्तिम नतिजा सार्वजनिक भएसँगै नेपाली कांग्रेसभित्र संसदीय दलको नेता चयनलाई लिएर राजनीतिक सरगर्मी बढेको छ। पार्टी विधानअनुसार एकभन्दा बढी उम्मेदवार भए गोप्य मतदानबाट दलको नेता चयन हुने व्यवस्था भएकाले यसपटक प्रतिस्पर्धा हुने लगभग निश्चित देखिएको छ।
कांग्रेसभित्र हाल दुई प्रमुख धार देखिएका छन्—एकातिर शेरबहादुर देउवा र डा. शेखर कोइराला समूह, अर्कोतर्फ संस्थापन पक्ष। संख्यागत हिसाबले हेर्दा प्रतिनिधि सभामा देउवा–कोइराला समूहको स्पष्ट बहुमत देखिन्छ। कुल ३८ सांसदमध्ये २२ जना सो समूहका रहेका छन् भने संस्थापन पक्षसँग १६ सांसद छन्।
दलको नेताका लागि अर्जुननरसिंह केसी र भिष्मराज आङ्देम्बे प्रमुख दाबेदारका रूपमा अगाडि आएका छन्। यसबाहेक अन्य केही नेताहरूले पनि आकांक्षा देखाएका छन्। नेताहरूका अनुसार गुटगत समीकरणका कारण सर्वसम्मत नेतृत्व चयन हुने सम्भावना कम रहेको छ।
पार्टीभित्र विशेष महाधिवेशन र नियमित महाधिवेशन पक्षधरबीचको विवाद अझै समाधान भइनसकेको अवस्थामा दलको नेता चयन प्रक्रिया झन् जटिल बन्ने देखिएको छ। यद्यपि केही नेताहरूले दुवै समूह मिलेर अघि बढ्ने प्रयास भइरहेको बताएका छन्।
उता राष्ट्रिय सभामा भने कांग्रेस सबैभन्दा ठूलो दलका रूपमा रहेको छ र त्यहाँ देउवा समूह एक्लै बहुमतमा रहेको छ। यसले पनि समग्र शक्ति सन्तुलनमा देउवा–कोइराला समूहलाई थप बलियो बनाएको छ।
अब केन्द्रीय समिति बैठकपछि मात्रै संसदीय दलको नेता चयन प्रक्रिया औपचारिक रूपमा सुरु हुने बताइएको छ। त्यसपछि कांग्रेसभित्रको शक्ति सन्तुलन कता मोडिन्छ भन्ने स्पष्ट हुने अपेक्षा गरिएको छ।
