धादिङ । नेपाल पत्रकार महासंघ धादिङले पत्रकार सुरेश रजकको हत्या तथा विभिन्न सञ्चारगृह र पत्रकारहरूमाथि भएको आक्रमणको कडा भर्त्सना गर्दै दोषीलाई कारबाही गर्न माग गरेको छ। महासंघले प्रमुख जिल्ला अधिकारी सुमन घिमिरेमार्फत संघीय सरकारलाई ध्यानाकर्षण पत्र बुझाएको छ।
पत्रकार महासंघका अध्यक्ष सीताराम अधिकारीको नेतृत्वमा गएको सञ्चारकर्मीहरूको टोलीले जिल्ला प्रशासन कार्यालयमा पुगेर अपराधीहरूलाई कानुनी कठघरामा ल्याउन तथा पीडितलाई न्याय दिन माग गरेको हो।
ध्यानाकर्षण पत्रमा उल्लेख भएअनुसार, पत्रकार सुरेश रजक समाचार संकलनका क्रममा आगजनीको चपेटामा परेर ज्यान गुमाउन पुगेका थिए। साथै, अन्नपूर्ण पोस्ट दैनिक, कान्तिपुर टेलिभिजन, हिमालय टेलिभिजनलगायतका सञ्चारमाध्यमका भवन तथा साधनमाथि आक्रमण भएको छ। पत्रकार दिनेश गौतममाथि कुटपिट गरी खुट्टा भाँचिएको र फोटो पत्रकार निराज तामाङको क्यामेरा समेत हराएको छ।
महासंघले घटनाको निष्पक्ष छानबिन गरी दोषीलाई कडा कारबाही गर्न, ज्यान गुमाएका पत्रकारको परिवारलाई क्षतिपूर्ति उपलब्ध गराउन, सञ्चारमाध्यमलाई पुगेको क्षतिको भरपाई गर्न तथा घाइते पत्रकारहरूको निःशुल्क उपचारको व्यवस्था मिलाउन सरकारसँग माग गरेको छ।
यदि एक साताभित्र माग सम्बोधन नभए देशव्यापी आन्दोलन गर्ने चेतावनी महासंघले दिएको छ। प्रमुख जिल्ला अधिकारी घिमिरेले ध्यानाकर्षण पत्र संघीय सरकारलाई पठाउने प्रतिबद्धता जनाउँदै पत्रकार सुरक्षाका लागि प्रशासन गम्भीर रहेको बताएका छन्।
